ਥੋੜ੍ਹੀ-ਮਿਆਦ ਦੇ ਨੁਕਸਾਨ

ਥੋੜ੍ਹੀ ਮਿਆਦ ਲਈ ਸ਼ਰਾਬ ਦੀ ਵਰਤੋਂ ਤੁਹਾਡੀਆਂ ਰੋਕਾਂ ਨੂੰ ਘਟਾ ਸਕਦੀ ਹੈ ਜਿਸ ਦਾ ਸਿੱਟਾ ਮਾੜੀਆਂ ਚੋਣਾਂ ਦੇ ਰੂਪ ਵਿੱਚ ਨਿਕਲ ਸਕਦਾ ਹੈ।

ਇੱਕੋ ਮੌਕੇ ’ਤੇ ਬਹੁਤ ਜ਼ਿਆਦਾ ਸ਼ਰਾਬ ਪੀਣ ਕਰਕੇ ਥੋੜ੍ਹੀ ਮਿਆਦ ਦੇ ਨੁਕਸਾਨ ਆਮ ਤੌਰ ’ਤੇ ਤਿੰਨ ਸ਼੍ਰੇਣੀਆਂ ਵਿੱਚ ਆਉਂਦੇ ਹਨ:

• ਸਿਹਤ/ਸੁਰੱਖਿਆ - ਡਿੱਗ ਪੈਣ ਅਤੇ ਗੱਡੀਆਂ ਦੇ ਹਾਦਸਿਆਂ ਕਰਕੇ ਸੱਟਾਂ। ਤੁਸੀਂ ਸ਼ਰਾਬ ਦੀ ਓਵਰਡੋਜ਼ ਦਾ ਸ਼ਿਕਾਰ ਵੀ ਹੋ ਸਕਦੇ ਹਨ, ਜਿਸਨੂੰ ਸ਼ਰਾਬ ਦਾ ਜ਼ਹਿਰੀਲਾਪਣ ਵੀ ਕਿਹਾ ਜਾਂਦਾ ਹੈ।

• ਕਨੂੰਨੀ - ਸ਼ਰਾਬ ਅਪਰਾਧਕ ਵਿਵਹਾਰ ਵਿੱਚ ਵੀ ਯੋਗਦਾਨ ਪਾ ਸਕਦੀ ਹੈ ਜਿਵੇਂ ਕਿ ਅਪਮਾਨਜਨਕ ਵਿਵਹਾਰ, ਸ਼ਰਾਬ ਪੀ ਕੇ ਗੱਡੀ ਚਲਾਉਣਾ, ਗੈਰ-ਅਨੁਸ਼ਾਸ਼ਨੀ ਵਿਵਹਾਰ ਅਤੇ ਹਮਲੇ।

• ਸਮਾਜਕ - ਸ਼ਰਾਬੀ ਹੋਣ ਮੌਕੇ ਤੁਹਾਡੇ ਵੱਲੋਂ ਵਿਵਹਾਰ ਕਰਨ ਦੇ ਤਰੀਕੇ ਕਰਕੇ ਦੋਸਤ ਗੁਆਉਣ ਤੋਂ ਲੈ ਕੇ ਸ਼ਰਾਬ ਉੱਤੇ ਹੱਦੋਂ ਵੱਧ ਖ਼ਰਚ ਕਰਨ ਕਰਕੇ ਬਿੱਲ ਚੁਕਾਉਣ ਦੇ ਯੋਗ ਨਾ ਹੋਣ ਤੱਕ ਦੀਆਂ ਸਮੱਸਿਆਵਾਂ ਸ਼ਾਮਲ ਹੋ ਸਕਦੀਆਂ ਹਨ।

ਲੰਬੀ-ਮਿਆਦ ਦੇ ਨੁਕਸਾਨ

ਉੱਪਰ ਸੂਚੀਬੱਧ ਥੋੜ੍ਹੀ ਮਿਆਦ ਦੇ ਨੁਕਸਾਨਾਂ ਦੇ ਨਾਲ-ਨਾਲ, ਨਿਰੰਤਰ ਆਧਾਰ ’ਤੇ ਹੱਦੋਂ ਵੱਧ ਸ਼ਰਾਬ ਪੀਣਾ ਕਈ ਸਾਰੀਆਂ ਬਿਮਾਰੀਆਂ ਦਾ ਖਤਰਾ ਵਧਾ ਦਿੰਦਾ ਹੈ ਅਤੇ ਤੁਹਾਡੀ ਸਿਹਤ ਦੀ ਗੁਣਵੱਤਾ ਨੂੰ ਪ੍ਰਭਾਵਿਤ ਕਰ ਸਕਦਾ ਹੈ ਜਿਵੇਂ ਕਿ:

• ਪਾਚਨ ਪ੍ਰਣਾਲੀ ਦੇ ਵਿਕਾਰ (ਉਦਾਹਰਨ ਲਈ ਪੇਟ ਵਿੱਚ ਫੋੜੇ)
• ਜਿਗਰ ਦੀ ਬੀਮਾਰੀ
• ਆਹਾਰ ਸੰਬੰਧੀ ਕਮੀਆਂ ਅਤੇ ਕੁਪੋਸ਼ਣ
• ਇਕਾਗਰਤਾ ਅਤੇ ਯਾਦਦਾਸ਼ਤ ਸੰਬੰਧੀ ਸਮੱਸਿਆਵਾਂ
• ਸੌਣ ਵਿੱਚ ਮੁਸ਼ਕਿਲਾਂ/ਮਾਨਸਿਕ ਸਿਹਤ ਸੰਬੰਧੀ ਸਮੱਸਿਆਵਾਂ
• ਆਤਮ-ਹੱਤਿਆ ਅਤੇ ਆਤਮਘਾਤੀ ਵਿਵਹਾਰ
• ਮਿਜਾਜ਼ ਅਤੇ ਸ਼ਖਸੀਅਤ ਵਿੱਚ ਤਬਦੀਲੀਆਂ ਦੇ ਨਾਲ ਦਿਮਾਗ ਨੂੰ ਨੁਕਸਾਨ
• ਹੱਦੋਂ ਵੱਧ ਭਾਰ ਅਤੇ ਮੋਟਾਪਾ
• ਜਿਨਸੀ ਨਿਪੁੰਸਕਤਾ ਅਤੇ ਉਪਜਾਊਪਣ (fertility) ਵਿੱਚ ਕਮੀ
• ਖ਼ੂਨ ਦਾ ਉੱਚ ਦਬਾਅ ਅਤੇ ਦਿਮਾਗੀ ਦੌਰਾ
• ਕੈਂਸਰ
• ਦਿਲ-ਧਮਣੀ ਦੀ ਬਿਮਾਰੀ
• ਸ਼ੂਗਰ (ਡਾਇਬਿਟਿਜ਼)
• ਦਿਲ ਨੂੰ ਨੁਕਸਾਨ
• ਅਣਜਨਮੇਂ ਬਾਲਾਂ ਅਤੇ ਦੁੱਧ ਪੀਣ ਵਾਲੇ ਬਾਲਾਂ ਨੂੰ ਨੁਕਸਾਨ।

ਥੋੜ੍ਹੀ-ਮਿਆਦ ਦੇ ਨੁਕਸਾਨ

ਇਹ ਉਸ ਸਮੇਂ ਵੀ ਵਾਪਰ ਸਕਦੇ ਹਨ ਜਦ ਕੋਈ ਦਵਾਈ ਸਿਰਫ਼ ਇੱਕ ਵਾਰ ਹੀ ਲਈ ਜਾਂਦੀ ਹੈ; ਜਾਂ ਜਦ ਤਜਵੀਜ਼ਸ਼ੁਦਾ ਦਵਾਈਆਂ ਨੂੰ ਤਜਵੀਜ਼ ਅਨੁਸਾਰ ਨਹੀਂ ਲਿਆ ਜਾਂਦਾ। ਵੱਖ-ਵੱਖ ਦਵਾਈਆਂ ਵਿੱਚ ਵੱਖ-ਵੱਖ ਰਸਾਇਣ ਹੁੰਦੇ ਹਨ ਅਤੇ ਇਹਨਾਂ ਦੇ ਸਿਹਤ ਪ੍ਰਭਾਵ ਵੱਖ-ਵੱਖ ਹੁੰਦੇ ਹਨ। ਨੁਕਸਾਨ ਦਾ ਪੱਧਰ ਲਈ ਗਈ ਨਸ਼ੀਲੀ ਦਵਾਈ ਅਤੇ ਨਸ਼ੀਲੀ ਦਵਾਈ ਵਰਤਣ ਦੇ ਤਰੀਕੇ ’ਤੇ ਨਿਰਭਰ ਕਰ ਸਕਦਾ ਹੈ।

ਲੰਬੀ-ਮਿਆਦ ਦੇ ਨੁਕਸਾਨ

ਕਈ ਕਿਸਮਾਂ ਦੀਆਂ ਨਸ਼ੀਲੀਆਂ ਦਵਾਈਆਂ ਦੀ ਲੰਬੀ-ਮਿਆਦ ਦੀ ਵਰਤੋਂ ਦਾ ਸਿੱਟਾ ਅਸਹਿਣਸ਼ੀਲਤਾ ਅਤੇ ਨਿਰਭਰਤਾ ਦੇ ਰੂਪ ਵਿੱਚ ਨਿਕਲ ਸਕਦਾ ਹੈ, ਜਿਸਦਾ ਮਤਲਬ ਇਹ ਹੈ ਕਿ ਸਮਾਂ ਪਾ ਕੇ ਸਰੀਰਕ ਅਤੇ ਮਨੋਵਿਗਿਆਨਕ ਤਬਦੀਲੀਆਂ ਤੁਹਾਡੇ ਸਰੀਰ ਵਿੱਚ ਵਾਪਰ ਸਕਦੀਆਂ ਹਨ।

ਸਰੀਰਕ ਤੌਰ ’ਤੇ, ਤੁਹਾਡਾ ਸਰੀਰ ਬਕਾਇਦਾ ਆਧਾਰ ’ਤੇ ਨਸ਼ੀਲੀ ਦਵਾਈ ਲੈਣ ਦਾ ਆਦੀ ਹੋ ਜਾਂਦਾ ਹੈ ਅਤੇ ਤੁਹਾਨੂੰ ਲੱਗ ਸਕਦਾ ਹੈ ਕਿ ਤੁਹਾਨੂੰ ਓਨਾ ਹੀ ਅਸਰ ਹਾਸਲ ਕਰਨ ਲਈ ਵਧੇਰੇ ਨਸ਼ੀਲੀ ਦਵਾਈ ਲੈਣ ਦੀ ਲੋੜ ਪੈ ਸਕਦੀ ਹੈ।

ਮਾਨਸਿਕ ਤੌਰ ’ਤੇ ਤੁਹਾਡੇ ਵਿਚਾਰ ਅਤੇ ਭਾਵਨਾਵਾਂ ਨਸ਼ੀਲੀ ਦਵਾਈ ਦੇ ਆਸ-ਪਾਸ ਘੁੰਮਦੇ ਹਨ ਅਤੇ ਤੁਹਾਨੂੰ “ਤਲਬ” ਲੱਗਣੀ ਸ਼ੁਰੂ ਹੋ ਸਕਦੀ ਹੈ। ਇਸ ਪੜਾਅ ’ਤੇ, ਕੁਝ ਨਸ਼ੀਲੀਆਂ ਦਵਾਈਆਂ ਤੋੜ ਲੱਗਣ ਦਾ ਕਾਰਨ ਬਣ ਸਕਦੀਆਂ ਹਨ ਜਦੋਂ ਤੁਸੀਂ ਇਹਨਾਂ ਵਿੱਚ ਕਟੌਤੀ ਕਰਦੇ ਹੋ ਜਾਂ ਇਹਨਾਂ ਦੀ ਵਰਤੋਂ ਬੰਦ ਕਰਦੇ ਹੋ।

ਲੰਬੀ ਮਿਆਦ ਲਈ ਨਸ਼ੀਲੀ ਦਵਾਈ ਦੀ ਵਰਤੋਂ ਕਰਨ ਦੇ ਸਿੱਟੇ ਵਜੋਂ ਹੋਰ ਲੰਬੀ ਮਿਆਦ ਦੇ ਨੁਕਸਾਨ ਵਾਪਰ ਸਕਦੇ ਹਨ ਜੋ ਵਰਤੀ ਜਾ ਰਹੀ ਨਸ਼ੀਲੀ ਦਵਾਈ ਅਤੇ ਇਸ ਨੂੰ ਲਏ ਜਾਣ ਦੇ ਤਰੀਕੇ ’ਤੇ ਨਿਰਭਰ ਕਰਨ ਅਨੁਸਾਰ ਵੱਖ-ਵੱਖ ਹੋ ਸਕਦੇ ਹਨ।

ਕਿਸੇ ਵਿਅਕਤੀ ਨੂੰ ਓਵਰਡੋਜ਼ (ਹੱਦੋਂ ਵੱਧ ਮਾਤਰਾ ਲੈਣਾ) ਲੈ ਚੁੱਕਾ ਆਖਿਆ ਜਾ ਸਕਦਾ ਹੈ ਜੇ ਕਿਸੇ ਨਸ਼ੀਲੀ ਦਵਾਈ ਦੀ ਆਮ ਨਾਲੋਂ ਵੱਡੀ ਮਾਤਰਾ ਚਾਣਚੱਕ ਜਾਂ ਜਾਣਬੁੱਝ ਕੇ ਲੈਣ ਦੇ ਸਿੱਟੇ ਵਜੋਂ ਉਹ ਕਿਸੇ ਡਾਕਟਰੀ ਐਮਰਜੈਂਸੀ ਤੋਂ ਪੀੜਤ ਹੋ ਜਾਂਦਾ ਹੈ। ਇਸ ਕਿਸਮ ਦੀ ਓਵਰਡੋਜ਼ ਕਿਸੇ ਤਜਵੀਜ਼ਸ਼ੁਦਾ ਦਵਾਈ ਜਾਂ ਕਿਸੇ ਗੈਰ-ਕਨੂੰਨੀ ਨਸ਼ੀਲੀ ਦਵਾਈ ਜਾਂ ਦਵਾਈਆਂ ਦੇ ਸੁਮੇਲ ਦੀ ਬਹੁਤ ਜ਼ਿਆਦਾ ਮਾਤਰਾ ਲੈਣ ਦੇ ਸਿੱਟੇ ਵਜੋਂ ਹੋ ਸਕਦੀ ਹੈ।

ਓਵਰਡੋਜ਼ ਦਾ ਕਾਰਨ ਬਣਨ ਵਾਲੀ ਦਵਾਈ ਦੀ ਮਾਤਰਾ ਵੱਖ-ਵੱਖ ਹੁੰਦੀ ਹੈ। ਇਹ ਇਸ ਗੱਲ ’ਤੇ ਨਿਰਭਰ ਕਰਦਾ ਹੈ ਕਿ ਕੋਈ ਵਿਅਕਤੀ ਨਸ਼ੀਲੀ ਦਵਾਈ ਨੂੰ ਕਿੰਨ੍ਹਾ ਕੁ ਸਹਿਣ ਕਰਦਾ ਹੈ, ਨਸ਼ੀਲੀ ਦਵਾਈ ਕਿੰਨ੍ਹੀ ਕੁ ਸ਼ੁੱਧ ਹੈ ਅਤੇ ਕੀ ਵਿਅਕਤੀ ਸ਼ਰਾਬ ਪੀਂਦਾ ਰਿਹਾ ਹੈ ਜਾਂ ਉਸਨੇ ਸਿੱਧਾ-ਕਾਊਂਟਰ-ਤੋਂ-ਮਿਲਣ-ਵਾਲੀਆਂ ਦਵਾਈਆਂ, ਤਜਵੀਜ਼ਸ਼ੁਦਾ ਜਾਂ ਹੋਰ ਗੈਰ-ਕਨੂੰਨੀ ਦਵਾਈਆਂ ਦਾ ਸੁਮੇਲ ਲਿਆ ਹੈ।

ਓਵਰਡੋਜ਼ ਦੇ ਸਭ ਤੋਂ ਗੰਭੀਰ ਸਿੱਟੇ ਚੇਤਨਾ ਦੇ ਗੁੰਮ ਹੋਣ, ਸਾਹ-ਕਿਰਿਆ ਅਤੇ ਦਿਲ ਦੀਆਂ ਸਮੱਸਿਆਵਾਂ ਨਾਲ ਸੰਬੰਧਿਤ ਹੁੰਦੇ ਹਨ। ਜੇ ਤੁਸੀਂ ਇਹਨਾਂ ਵਿੱਚੋਂ ਕਿਸੇ ਚੀਜ਼ਾਂ ਨੂੰ ਅਨੁਭਵ ਕਰ ਰਹੇ ਹੋ, ਤਾਂ ਤੁਹਾਨੂੰ ਤੁਰੰਤ ਮਦਦ ਮੰਗਣ ਦੀ ਲੋੜ ਪੈ ਸਕਦੀ ਹੈ। ਸਿੱਟੇ ਵਜੋਂ ਮੌਤ ਹੋ ਸਕਦੀ ਹੈ।

ਨਸ਼ੀਲੀ ਦਵਾਈ ਨਾਲ ਸੰਬੰਧਿਤ ਸਾਰੇ ਡਾਕਟਰੀ ਸੰਕਟਕਾਲਾਂ ਵਾਸਤੇ, ਐਂਬੂਲੈਂਸ ਮੰਗਵਾਉਣ ਲਈ ਤੁਰੰਤ 000 ’ਤੇ ਫੋਨ ਕਰੋ।

ਪੁਲਿਸ ਤਦ ਤੱਕ ਹਾਜ਼ਰ ਨਹੀਂ ਹੋਵੇਗੀ ਜਦ ਤੱਕ ਐਂਬੂਲੈਂਸ ਅਫਸਰ ਮਦਦ ਲਈ ਫੋਨ ਨਹੀਂ ਕਰਦੇ ਜਾਂ ਮੌਤ ਨਹੀਂ ਹੋ ਜਾਂਦੀ।